2003ko urtarrilean, hain taberna berezia zen La Bodeguicak, bere ateak berrireki zituen, Aldapa karrikako 4ean.

La Bodeguica Alde Zaharra Auzo Elkarteak alokatutako taberna bat da, profesional talde batek kudeatuta eta bilgune berezia izateko asmoa duena, lasai ederrean solasean aritzekoa, lagunekin topagune izatekoa, batzar baten ondotik ardo bat edo kazuelika bat hartzekoa... Leku estrategikoan kokatua dago, hain zuzen ere Auzoenea Elkarte-Zentroaren, hau da, Auzo Elkartearen egoitzaren pare-parean.

Aurreko talde kudeatzailearen lan ikaragarriaren ondoren gauzatu ahal izan da ideia hau, eta egungo taldearen lanari esker ere. Halaber Auzo Elkartearen partaideek oso lan ona egin dute. Txokoa ederki prestatuta dago afariak, bazkariak edota bestelako ospakizunak egin ahal izateko.

Beraz, taberna honek desberdina izan nahi du, auzo mugimenduaren usain gozoa topatzeko modukoa, bidenabar erakusketak, emanaldiak, kultura eta halako jarduerak biltzen dituen aldi berean.
Biribil-biribila den teoria daukagu: humanitatearen aurrerapen eta lorpen handienak bazkalondo goxo batetik abiatuak izan dira, ardo on bat dastatuz edota lagun batekin izandako solasaldi lasaian.