Une hauetan, eta zerrenden eguneratze lanetan murgildurik elkarteak 456 bazkide ditu, hilean 1,50 _ko kuota ordaintzen dutenak
Finantzatzeko modua edozein herri mugimenduaren koska izaten da eta gu ez gara ezberdinak arlo horretan. Bazkideen kuotez gain, gure jarduerak egin ahal izateko diru-laguntza zenbait ditugu: Iruñeko Udala, Nafarroako Gobernua, Europar Batasuna, entitate pribatuak... Gure eguneroko lanaren baitan dago autonomia ekonomiko handiagoa lortzeko urratsak egitea, administrazioaren hitzarmenen eta diru-laguntzen menpe ez egoteko.

Urtean behin egiten den bazkide guztiendako Batzar irekiaren bidez antolatzen da elkartea, baita hilero egiten den lan-bileraren bidez, batzordeen egitekoa ezagutzeko eta antolatzeko modua ahalbidetzen diguna.

Batzordeetan parte hartzeko ez da ezinbestekoa (gomendagarria bada ere) Auzo Elkartearen bazkide izatea, aski da gaizki doazen kontuak zuzendu ahal izatea, ongi doazenak baliatzea eta sustatzea eta, hauxe bai, auzo hau biziki maitatzea.

Hauxe duzue gure funtzionamendu xumea, eta oraingoz ez doakigu gaizki. Pertsona bakoitzak hobekien ezagutzen duen arlotik lan egiten saiatzen gara, edota bestela erosoen sentitzen denetik (hirigintza, hezkuntza, lan komunak, kultura, emakumea...), modu horretan harreman horizontalen sarea eraikiz, eta han denak gara berdin, eta denak baliagarri.

Hau honela izanik, bueltak eta bueltak ematen ditugu zure parte hartzea erraztu nahian, ahal edo nahi duzun modu edo neurrian, bazkidetuz, noizbehinka dokumentuak euskaratuz, Auzoenea lokaleko mantentze lan txikietan, bileretara etorriz... Zuk, hori zure gogoa baldin bada, gure arteko zure gunea bilatzea eta aurkitzea nahi genuke, egungo aukerak bultzatuz edo, agian, lan kolektibo hau zuk asmatutako era berri batez aurrera eramaten.

Zure esku dago.