Kukuso Merkatua 1999 urteaz geroztik “Alde Zaharra” Auzo Elkarteak eta Nafarroako Zaharki Salerosleen Elkarteak elkarlanean antolatutako ekitaldia da, hil bakoitzaren lehenbiziko larunbatean ospatzen dena.

Ekimenak bai Pariseko bai Amsterdameko merkatu ospetsuetatik hartu du izena, nahiz ongi dakigun horien neurria ezin konparatuzkoa dela gure merkatu xumearekin. Izpiritua, ordea, berdin-berdina dute, eta zaharkien profesionalen nahiz edozein pertsonaren bilgunea izan nahi du, bai bederen gauza erabiliak, zaharkituak, birziklatuak eta halakoak saltzeko, elkartrukatzeko edo besterik gabe erakusteko asmotan baldin badabiltza.

Helburu bikoitza du: batetik, oro har Alde Zaharraren bizigiroa bizkortzea, eta bereziki San Jose plazakoa, ttipia, txukuna eta merkatua kokatzeko aproposa, erdigunean ez egoteak hara hurbildu nahi dutenek Alde Zaharreko zati handixkoa zeharkatu behar izatea baitakar.

Beste helburua gauzen berrerabiltzea eta birziklatzea da, beharbada pertsona bati balio ez dizkion gauzak beste batek erabiliko dituelakoz, bidenabar zaharkien bildumatzeko zaletasuna herritarren artean bultzatuz.

Merkatutxo honetan, beraz, bigarren eskuko zernahi gauza dago salgai, hala nola, zaharkiak, trasteak, bildumak eta abar.

alerosketez gain, elkartrukatzea ere badago, eta bere gauzatxoak saldu edo trukatu nahi dituen edozein pertsonarendako gune irekia da, berrerabiltze eta birziklatze izpirituaren barnean betiere.

Erakusgai diren gauzak erabiliak, berrerabiliak edo birziklatuak izaten dira, eta zahar samarrak edo bildumatzeko modukoak behar dute izan. Hortaz, saldu edo elkartrukatu daitezke, besteak beste, tebeoak, postalak, liburuak, diskoak, San Fermineko kartelak, zinema-programak, lisagailu zaharrak, argiaren etengailu zaharrak, argi-tresna zaharrak, trasteak eta zaharkiak. Aitzitik, elikagaiak, eskulanak edota sailean fabrikatutako etxetresna elektrikoak (garbigailuak, hozkailuak...) ezin dira saldu ezta elkartrukatu ere,
Kukuso Merkatuan bai bilduma-profesionalek bai edozein pertsonak parte har dezakete.